Noticias

Conversas, unha iniciativa para achegar a ciencia á sociedade
16-03-2021

Conversas, unha iniciativa para achegar a ciencia á sociedade

Conversas é un ciclo de conferencias de divulgación promovido polo proxecto “meta.” da Facultade de Ciencias Empresariais e Turismo do Campus de Ourense (FCETOU). Nestes faladoiros investigadoras e investigadores comparten escenario con profesionais, directivos, empresarios/as, emprendedores e outros axentes sociais. Os temas das conversas son de interese xeral, tratando temas de actualidade relacionados co mundo da empresa e a súa relación coa sociedade e o medio ambiente. O obxectivo principal desta iniciativa é divulgar, promover o debate e a crítica de novos coñecementos, ideas e opinión a amplos colectivos sociais.

Hoxe falamos con Ernesto López-Valeiras, profesor da FCETOU e coordinador de “meta.”, e Xurxo Baca, deseñador e mentor en “meta.”, un proxecto de mentoring que pon en contacto a directivas e directivos cunha traxectoria profesional relevante con estudantes de últimos cursos co obxectivo de que os apoien e lles dean consello para un adecuado desenvolvemento profesional e persoal. Ademais, busca transmitir valores de sustentabilidade, solidariedade e ética nos negocios.    

Meta é o proceso de aprendizaxe persoal no que un mentor comparte o seu tempo e coñecementos para que un mentorizado descubra novas perspectivas que lle axuden a progresar cara ás metas futuras. Meta non é un fin. É un camiño.   

Este ano, que é o segundo que se celebra, participan 7 mentores e 8 mentorizados. Entre as actividades grupais que realizan atópase o ciclo Conversas.


"Conversas é unha aposta que nace das ganas de aprendermos das experiencias"

"O ciclo de Conversas nace no seo do proxecto ”meta.” da FCETOU. Como parte dos valores, queremos promover a importancia de explorar territorios que descoñecemos, por iso cremos cegamente no valor de escoitar. Conversas é unha aposta que nace das ganas de aprendermos das experiencias vividas, das decisións tomadas, das decisión que non se tomaron, dos acertos que foron erros, dos erros que foron acertos, e doutros tantos azares que ao longo da vida definen aquilo no que nos convertemos", reflexiona o deseñador Xurxo Baca.


Como se estruturan as conversas?


"Eu son o coordinador académico desta actividade, e xunto con Xurxo Baca, coordinador profesional, deseñamos o formato xeral. Cada Conversa é organizada por un mentor e o seu mentorizado. Eles propoñen un poñente invitado e un profesor-investigador e organizan a Conversa: data, contido, formato, etc. O mentor e o profesor/a-investigador/a acompañan ao poñente na Conversa. Esta combinación de distintos perfís favorece o debate e a reflexión, así como o acercamento da investigación á sociedade".

"Tratamos de que participen persoas que teñan cousas interesantes que contar. Escoitarnos a través do relato alleo permítenos imaxinar outras realidades, e axúdanos a camiñar cara a un mundo mellor. Xurxo, ó igual que cada mentor, aporta una visión allea á do mundo educativo, e isto é o que nos enriquece como profesionais e como persoas. Ao ser deseñador son moi interesantes os procesos que leva a cabo para encontrar solucións a diferentes problemas. Creo que todo está moi conectado, máis do que poidamos pensar", comenta o profesor Ernesto López-Valeiras.

Esta actividade nace con vocación de permanencia. Polo momento, teñen previsto realizar Conversas de forma periódica, cunha frecuencia bimensual. O formato prioritario é o presencial, pero tamén se retransmiten de forma telemática a través do Campus Remoto da Universidade de Vigo.

Primeiras sensacións


"A acollida das Conversas superou as nosas expectativas. Por sorte, puidemos facer algunhas presenciais, e cubríronse as prazas dispoñibles, limitadas polo protocolo COVID. A retransmisión a través do Campus Remoto permitiu que chegase a un grande número de persoas", sinala Ernesto.

A divulgación científica é un dos grandes temas pendentes dos investigadores. O formato das Conversas, combinando as perspectivas académicas e profesionais, pode facilitar a chegada da mensaxe á sociedade. Polo momento esta iniciativa conta coa colaboración do Campus de Ourense, a Asociación Iberoamericana de Control de Xestión e de ECOBAS, pero en datas próximas incorporaranse outros patrocinadores que colaboren coa organización destas actividades.    
 SUSCRÍBETE A ECOBAS

Configuración de cookies

Este sitio web utiliza cookies para mejorar la experiencia mientras se navega por el sitio web. Las cookies que se clasifican como necesarias se almacenan en el navegador ya que son esenciales para el funcionamiento básico del sitio web. También utilizamos cookies de terceros que nos ayudan a analizar y comprender cómo utilizas este sitio web; estas cookies se almacenarán en tu navegador sólo con tu consentimiento. También tienes la opción de no permitir estas cookies, sin embargo, la exclusión de algunas de estas cookies puede afectar a tu experiencia de navegación.

Cookies necesarias


Estas cookies son estrictamente necesarias para el funcionamiento de la página, las puedes desactivar cambiando la configuración de tu navegador pero no podrás usar la página con normalidad.

cb-enabled
cookieControl

Instrucciones sobre cómo eliminar las cookies y más información en nuestra política de cookies.