Noticias

Mario Pansera chega a ECOBAS para desenvolver unha axenda de investigación orixinal e alternativa
02-02-2021

Mario Pansera chega a ECOBAS para desenvolver unha axenda de investigación orixinal e alternativa

O investigador Mario Pansera incorpórase á Agrupación Estratéxica esta semana para levar a cabo a súa investigación na Universidade de Vigo durante cinco anos. Pansera conseguiu recentemente unha axuda Starting Grant do Consello Europeo de Investigación (ERC).  

Existen moitas probabilidades de que a súa estancia se alongue
 

Ata o momento, Pansera estivo traballando como lector cun contrato Serra Hunter na Universidade Autónoma de Barcelona, e non vai deixar completamente a súa función. “Estamos en trámites para que se firme un convenio entre as dúas universidades para que poda seguir colaborando coa UAB como investigador vinculado. A miña investigación na UAB foi unha continuación do traballo feito en Bristol e durante o ano pasado conseguín publicar o meu traballo sobre innovación responsable na revista Research Policy, e a miña investigación sobre post-crecemento na revista Organization. A verdade é que a UAB ten moitos recursos e moita xente moi interesante, pero case seguro que quedarei en Galicia despois do proxecto ERC. Entre outras cousas porque o acordo coa UVigo inclúe unha praza de titular”, aclara o doutor.  

Ideas novas e frescas
 

Mario Pansera considera que a UVigo segue sendo bastante tradicional no que concirne á ensinanza de materias como economía e organización de empresas. Sen embargo, nos últimos meses atopou moitos investigadores, sobre todo xente nova, con ganas de explorar novos camiños, novas ideas. “Xa colaboro activamente co grupo REDE e co grupo GEN, aínda que habería que dicir que quizás o grupo que máis se acerca ó tipo de investigación que levo a cabo é o grupo de Economía Ecolóxica (GIIEAH) con quen me gustaría colaborar no futuro. Ademais, tamén teño moi bos contactos coa Agrupación CRETUS, na Universidade de Santiago de Compostela, e colaboro co campus de sustentabilidade da Universidade da Coruña onde a excelente Adina Dumitru está facendo un traballo espectacular”, puntúa o investigador.  

Nos próximos meses publicaranse diferentes convocatorias para contratar un Project manager, catro doutorandos e dous posdocs
 

Dentro do proxecto, que se iniciou oficialmente o 1 de febreiro, traballarase en diferentes liñas de investigación. “Probablemente haberá un par de estudantes de doutoramento que se encarguen de analizar os aspectos máis micro de organizacións post-crecemento: as súas características, os obstáculos que atopan e as políticas que poden axudalas a sobrevivir. Outra liña de investigación ocuparase de redes e cadeas de abastecemento de organizacións alternativas. Por último, estudarase o papel das institucións científicas (universidades, centros de investigación, etc.) na reprodución do discurso e da ideoloxía do crecemento. A ambición é desenvolver un discurso alternativo que sexa capaz de desintoxicar, por así dicilo, ás institucións científicas desta obsesión co crecemento infinito”, aclara o doutor Pansera.
   

Pansera acaba de conseguir un proxecto H2020 de 3.6M de euros
 

“É un proxecto sobre economía circular que vou coordinar dende a UVigo. O proxecto titulase “A just transition to Circular Economy (JUST2CE)” e involucra 13 beneficiarios, entre os que se atopan universidades europeas e africanas. O estudo ten como obxectivo desenvolver un marco conceptual alternativo á formulación actual da Economía Circular como a expón a UE. Actualmente, a CE parece máis un sofisticado mecanismo do Green Washing. Cambiar a linguaxe, as maneiras de chamar ás cousas sen cambiar o modelo destrutor e insostible que impón a economía do mercado capitalista. O que queremos demostrar no proxecto é que para que unha economía sexa sostible ten que ser antes de todo xusta. A ironía é que un proxecto tan crítico coa formulación da UE sexa financiado xustamente pola mesma institución. O proxecto inclúe traballo de investigación en moitos países. ¡Todo un reto na situación actual!”, afirma o doutor Pansera.
 

“A tecnoloxía ten o poder de cambiar as relación sociais”
 

A maioría dos traballos do profesor Pansera tratan o tema da democratización da innovación. Ademais, traballa como editor da revista Journal of Responsible Innovation liderada por Erik Fisher da Arizona State University, institución coa que colabora dende o 2015. “Eu son enxeñeiro de teleco e sempre me interesou a relación entre a tecnoloxía e a sociedade. Sen embargo, creo que o momento que me levou a profundar neste campo foi cando traballei en Bolivia. Estiven case dous anos intentando convencer a indíxenas Quechuas e Aymaras a instalar paneis fotovoltaicos nas súas comunidades. O proxecto non foi un fracaso total, pero tampouco revolucionou a vida desta xente. En moitos casos, ademais, a tecnoloxía quedaba abandonada porque a xente tiña outras prioridades. Esta experiencia fíxome pensar moito sobre o rol da tecnoloxía como ferramenta política. Nós, sobre todo os científicos e enxeñeiros, pensamos que a tecnoloxía é neutral, apolítica, obxectiva. Pero non é así. A tecnoloxía ten o poder de cambiar as relación sociais en positivo, pero tamén ten consecuencias moi negativas, incluso pode substituír maneiras de vivir sostibles con novas formas de organizacións sociais destrutivas e inxustas. Un exemplo son os primeiros algoritmos de intelixencia artificial de recoñecemento facial do coche sen condutor de Google, que non eran capaces de recoñecer a persoas negras. Houbo varios accidentes nos primeiros test. ¡Isto sucedeu porque os que desenvolveron a tecnoloxía eran todos brancos e non se lles ocorreu adestrar ós algoritmos con fotos de xente non-branca! As tecnoloxías conteñen nos seus deseños os valores e as visións do mundo dos seus creadores. Isto non se ensina nas escolas de enxeñería e é un problema. Estamos creando xeracións de técnicos e enxeñeiros que non están preparados para enfrontarse ós dilemas éticos que presentan moitas das tecnoloxías modernas”.
 

“O meu obxectivo é crear un grupo de persoas abertas e creativas. Polo menos espero ter un mínimo de impacto no panorama galego e que se comece a falar destes temas. O que si me gustaría de verdade sería que ó final do proxecto, en cinco anos, haxa unha materia obrigatoria en todos os cursos de tecnoloxía, ciencia e enxeñería sobre ética da ciencia e tecnoloxía e innovación responsable. Non hai ningunha universidade española que teña feito algo así. ¡Sei que é u tarefa difícil, pero hai que intentalo!”, conclúe o doutor Pansera.  
 SUSCRÍBETE A ECOBAS

Configuración de cookies

Este sitio web utiliza cookies para mejorar la experiencia mientras se navega por el sitio web. Las cookies que se clasifican como necesarias se almacenan en el navegador ya que son esenciales para el funcionamiento básico del sitio web. También utilizamos cookies de terceros que nos ayudan a analizar y comprender cómo utilizas este sitio web; estas cookies se almacenarán en tu navegador sólo con tu consentimiento. También tienes la opción de no permitir estas cookies, sin embargo, la exclusión de algunas de estas cookies puede afectar a tu experiencia de navegación.

Cookies necesarias


Estas cookies son estrictamente necesarias para el funcionamiento de la página, las puedes desactivar cambiando la configuración de tu navegador pero no podrás usar la página con normalidad.

cb-enabled
cookieControl

Instrucciones sobre cómo eliminar las cookies y más información en nuestra política de cookies.